شو يعني.. وليش!!
شو يعني.. وليش!!
علي دياب شاهين
عندي صديق تزوج من ( دنماركيه ) لا هي بتحكي عربي، ولا هو بيعرف دنماركي ، أخذها ونزل عا بلدو ، وشوي شوي ، بلشت تتعلم اللغة العربية ، من أمه وأبوه ، وأختو ، وأخوه ، ومن الجيران ، ومن بياع الغاز ، وبياع الحليب ، ومن نشرة الأخبار ، ومن حكي النسوان ، ……..
وبلشت تسألو أسئلة….
شو يعني داعش ؟ شو يعني سني ؟ شو يعني شيعي ، شو يعني تكفير ؟ شو يعني تدمير ؟ شو يعني تشريد ، شو يعني تهجير ، شو يعني ختان ، شو يعني جهاد النكاح..
ودخلت بالممنوع والمحظور، وزوجها يتلفَّت شمال ويمين ويقلها وطي صوتك..
شو يعني الأمن العسكري ، والأمن السياسي ، والأمن الجوي ، والأمن الداخلي ، والأمن الخارجي ، والأمن الغذائي …..
وهو يتلفت ويحمر وجهه.. تابعت حديثها:
طالماعندكم كل ها الأجهزة، ليش حاطين قفل عا باب البيت ، وعا باب الحديقه ، وعا باب الخزانة ، وقفل عا باب البراد !!!!
ليش عا يشين عا آبار نفط وما معكم حق مازوت للصوبيا؟
ليش عندكم مصاري تشتروا ذخيرة وما عندكم مستشفى ؟
ليش عندكم مصاري تشتروا منصة صواريخ ، وما عندكم محطة كهربا ؟
ليش بتعمروا أبراج وما عندكم جامعة ؟
ليش عندكم عقل وما عندكم حكمة ؟
ليش عندكم قلب وما عندكم حب ؟
ليش بتاخدوا معاش وبترتشوا ؟
ليش الله كافيكم وبتسرقوا ؟
ليش بتسبوا نوابكم وإنتوا جبتهوهم ؟
ليش عندكم زوجة وبتتزوجوا أربعة ؟
ليش عندكم الله واحد وكل فئة بتصلي شكل ؟
ليش عندكم دين واحد ومية طايفة ؟
ليش بتحكوا لغة وحده وعندكم 22 دولة ، وليش وليش وليش ……
وهيك ضلت تسأل لرجعت عا بلدها تتعالج بمستشفى الأمراض العصبية وزوجها الله أعلم وين صار …….
صح ليش ,,جميل جدا جدا
بيكفي عنا شاهين واسمو علي…