الثلاثاء 20 أغسطس, 2019

الباب بيفوِّت جمل

الباب بيفوِّت جمل

علي دياب شاهين

13467489_1731449977125369_1934841453_oكان عندي مقابلة المراجع السويسرية ،عشان طلب ڤيزا ، ووقت إجا رقمي ، دخلت عند الموظفه ، فتحت الجواز وطلعت بشكلي ، وبصراحة الصورة إللي عا الجواز ضحكتي فيها شبر ، ومتفائل ، ومبسوط ، تقول سليل عائلة رومانوف ، الروسية ، أو أحد أحفاد أمراء موناكو من عائلة غريمالدي ، أو ابن نجيب ميقاتي..

وقت بلّشِت تتفحص الجواز ، وتضرب عا الحاسوب ، طّلعت فيي شوَيْ وضحكت ، وأنا صرت إبتسم ، وشفت حالي ، ونفشت ريشي ، لأنو حسيت إنو يمكن عجبها شكلي ، أو ضحكتي ، أو يمكن شافتني من زاوية وطنية ، وحطتني في خانة هجرة الأدمغة ، متل حسن كامل الصباح ، أو الإنسانيه ، متل عقاب صقر ، أو الهجرة السياسية ، متل الشيخ سعد ، أو الرأسماليه متل عصام فارس ..

مش هون القصة..

القصة وهيّي عم تضرب الحاسوب بلشت تطلع معها البيانات عن حالنا :

مش إنتو سرقتوا قانون السير السويسري ، وما عندكم طرقات ، عندكم فقط عجقات سير ، والجورة متر ، والموظف إللي بيطلع الساعة سبعة بيوصل عشرة ، وعقوبة المخالفة أكتر من الحد الأدنى للرواتب؟؟..

وكمّلِت..

مش إنتوا عندكم كل شي في زعماء بياكلوا غَلّة الشام وبيبيضوا بالعراق ، مشاكلهم من جوا ، وتمويلهم من برا؟؟..

مش إنتوا عندكم عشرين نهر ، وما عندكم كهربا ، وعندكم أحزاب أكتر من الصين ، وبدال (بدل) ما تبنوا وطن عملتو مزرعة؟؟..

مش إنتوا عندكم كل شي في قضاة ، وما عندكم عدل ، وكل قاضي تابع للزعيم ، وكل زعيم تابع للحزب ، وكل حزب تابع للطائفه ، وكل طائفة تابعة للدولة؟؟..

مش إنتوا عندكم أكبر موازنة للصحة ، والمستشفى عندكم أغلى من الهيلتون؟؟..

مش إنتوا عندكم كل شي في شياطين بالإدارة ، أو بالمؤسسة ، أو الوزارة ، وبترجموا الشيطان إللي بمكة؟؟..

وإنتوا …..وإنتوا ….وطوت الملف وضحكت ، وعطتني ياه ، ورجعتلي الجواز ، حسيتها عم تقول عا شو ضحكان ، الباب بيفوِّت جمل!!

تعليقات

comments

مقالات ذات صله

الرد

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.