الثلاثاء 10 أكتوبر, 2017

    شطآن الأمل

    (شطآن الأمل)

    الشاعر الزجلي: ولاء نزيه قسيس

    zajal

    بحر الحياة ال راكي عا شط الأمل

    حامل هموم وبين موجاتو شمل

    حبات لولو تاركه صَدفاتها

    صوب الأمل والحلم بعدو ما اكتمل

    ****

    شواطي الأمان ال صابها سكر وثمَل

    بالموت ياللي ساكب بكاساتها

    شو هالمصير المُر ربّي شو العمل

    صار الكفن مغزول من رملاتها

    ****

    بعدو الجرح مفتوح ما رح يندمل

    من هالزّمن باقي لنا غدراتها

    وببلادها الجهّال رعيان الحَمَل

    ما ضل فيها غير حيواناتها

    ****

    يلعن بو جهل ويلعنو شعب الجَمل

    خلّا الطٌفوله تنقصف شعراتها

    كانت جدايل نور بدر اللي اكتمل

    واليوم ذابو بالملح خصلاتها

    شْعوب الصحّاري “المؤمني” شْعوب الهَمل

    زرعت الخوف من الأمل دعواتها

    حتّى بموتو الطفل راسو موجّهو

    صوب البحر مش صوب شطآن الأمل

    مقالات ذات صله

    الرد

    لن يتم نشر عنوان بريدك الإلكتروني. الحقول الإلزامية مشار إليها بـ *