السبت 1 أكتوبر, 2022

يوميات استاذ مدرسة بـ 5 الشهر

يوميات استاذ مدرسة بـ 5 الشهر 

علي دياب شاهين

12316331_1653288008274900_7543604467680503990_nصديقي اللبناني المتزوج من سويسرية بسويسرا ، وهو استاذ رياضة بمدرسة يعني رأسمال شغلو بيلعِّب الأولاد طاق طاق طاقية ، أو شْوَيِةْ بوش أب ، أو غميضه أو إفتح يا سمسم.. وما نَقّب عيونوا بالمعلقات السبعة والصرف والنحو ، وزوجته موظفة بتبيع بسوبر ماركت ، يعني عيلة سويسرية ( مستورة )..

دعاني عا البحيرة بعطلة نهاية الأسبوع . وعندو كرفان بيشحطو بالسيارة ، مع بسكلات الأولاد ، وشختورة نفخ ، وصنانير صيد سمك.. وفيه كل أنواع الكيف ، بس التلفزيون مش مسلّط عا قنوات ( البخ ) العربي ، لأنه مش كتير صاحبي مهتم بعاصفة الحزم ، أو إذا الطيران الحربي العربي ما بيضرب إلاّ عند العرب ، أو إذا بدها تتقسم سورية بعد معارك حلب ، ، أو عن لبنان إذا كان رِبي ( الخز ) بين قفا المسؤول والكرسي ، أو عن السرقة ، والهدر ، والفساد ، أو عن المي والكهرباء ، وفواتير المستشفايات ، أو سلسلة الرتب .. أو .. أو …… السؤال الوحيد السياسي إللي سألني ياه إذا بحب خلطة السلطة بالخل أو بالحامض ..

مش هون القصة..

القصة ، وقت بيكون أبوك “الإستاذ” إللي طلع عا المعاش ، قاعد بالبيت بي 5 الشهر ، ولابس بيجامة قطن ، وبضهرها روب بوليستر لميع ، ونضارات رولكس (كعب كباية الشاي) خمس درجات ، وعا الطربيزه كل أصناف الأدوية ، وعم يتابع بالجريدة آخر تصورات باترك سيل ، أو نظريات هنري كيسنجر أو تنبؤات ناصر قنديل عن وضع المنطقة المستقبلي…

وفجأة بِيطُبْ لعندو زوار … ووقت بيعيطلك عا السريع وبيقلك : بتطير متل الميغ 29 عند دكان أبو فؤاد بتجيب قهوة ودخان وبزورات ، وبيختمها بجائزة ترضية بدل نقل ، جيب إلك بسكوتة ، زينة ونحول …

وبما إنو المهمة صادرة من جهة رسمية ، باخد الطريق بالعرض ، وعند ما أوصل عا الدكان بدفش بالزبائن ، لأنو أنا ابن “الإستاذ” بمهمة حكومية مستعجلة..

ووقت أوصل بوز ببوز لا أبو فؤاد و”أتلو عليه ما تيسر من محتوى الطلبية” ، كان جواب أبو فؤاد وهو (عاقد الحاجبين) : سلملي عا “الإستاذ” وقلو كبر الحساب .. ومتل ما انطلقت بسرعة الميغ رجعت متل جمل عربي “أصيل” أو متل الجيوش العربية ب 67 خاوي اليدين حتى من بسكوتة زينة ونحول .. ويطّلّع فيي “الإستاذ” ويقول : شو سكر أبو فؤاد .؟؟ لكن (إذن) قول لأمك (لوالدتك) تعملنا شاي عربي أكرك عجمي ، مع عرقين نعنع ..

ويكفي الحديث.. مين أكل بنت البستونة ؟؟..

تعليقات

comments

مقالات ذات صله

الرد

لن يتم نشر عنوان بريدك الإلكتروني.

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.